— Svona sækirðu um

Umsóknarferlið

Kynntu þér lögreglufræðina

Sækja um hjá Háskólanum á Akureyri

Fyrstu skrefin


Sótt er um á heimasíðu Háskólans á Akureyri (HA) um nám í lögreglufræðum fyrir verðandi lögreglumenn, hér. Opnað var fyrir umsóknir 14. febrúar og er umsóknarfrestur til og með 7.apríl 2022.

Almenn krafa er um að umsækjandi hafi lokið stúdentsprófi eða sambærilegu prófi. Uppfylli umsækjandi almenn inntökuskilyrði fyrir háskólavist mun hann, innan nokkurra daga, fá send skilaboð í umsóknargátt sína. Skilaboðin innihalda m.a. hlekk þar sem haldið er áfram með umsóknina. Þessi síðari hluti umsóknarferilsins fer fram  í gegnum rafræna gátt inni á island.is með rafrænum skilríkjum.

Vakin skal athygli á að umsókn er ekki fullgild nema umsækjandi klári báða ferlana og það sé gert innan auglýsts umsóknarfrests.

Mennta- og starfsþróunarsetur lögreglu (MSL) í samráði við Háskólann á Akureyri metur hverjir umsækjenda eru hæfir og uppfylla almenn skilyrði.

Umsækjendur sem standast skilyrði a og d-liðar 1. mgr. 38. gr. lögreglulaga, eru boðaðir í fyrri hluta inntökuferils. Bakgrunnsskoðun og læknisskoðun samkvæmt b og c-lið sömu laga fer fram á síðari hluta inntökuferilsins.

Brýnt er fyrir umsækjendum að kynna sér vel þau hæfisskilyrði sem gerð eru til umsækjenda áður en sótt er um í námið.

Umsækjendur sem koma til greina í lögreglufræðinám fyrir verðandi lögreglumenn þurfa að undirgangast læknisskoðun. Umsækjandi ber sjálfur kostnað af læknisskoðuninni.

Fyrirspurnir í tengslum við starfsnámið skal senda á netfangið starfsnam@logreglan.is  

Skilyrði til náms


Hvað þarf að gera og hvað þarf að uppfylla til að geta hafið nám í lögreglufræðum fyrir verðandi lögreglumenn?

Í 38. gr. lögreglulaga nr. 90/1996 og reglugerð um mennta- og starfsþróunarsetur lögreglu nr. 221/2017 eru tilgreind þau skilyrði sem umsækjandi um lögreglunám þarf að uppfylla. Þar segir m.a. að viðkomandi skuli:

a. vera íslenskir ríkisborgarar, 20 ára eða eldri,

b. ekki hafa gerst brotlegir við refsilög, þetta gildir þó ekki ef brot er smávægilegt eða langt er um liðið frá því að það var framið, né hafa sýnt af sér háttsemi sem getur rýrt það traust sem lögreglumenn verða almennt að njóta,

c. vera andlega og líkamlega heilbrigðir og standast læknisskoðun trúnaðarlæknis samkvæmt fyrirliggjandi kröfum sem mennta- og starfsþróunarsetur lögreglu setur reglur um í samstarfi við háskóla,

d. hafa lokið stúdentsprófi eða annarri sambærilegri menntun,

e. standast nánari kröfur sem ráðherra setur með reglugerð, á grundvelli tillagna frá mennta- og starfsþróunarsetri lögreglu, m.a. um menntun, starfsþjálfun, tungumálakunnáttu og líkamlega færni,

f. hafa gild ökuréttindi.

Umsækjendur sem standast skilyrði a og d liðar 1. mgr. 38. gr. lögreglulaga nr. 90/1996 og 2. mgr. 6. gr. reglugerðar nr. 221/2017 taka þátt í fyrri hluta inntökuferilsins.

Þeir umsækjendur sem standast öll skilyrði 1. mgr. 38. gr. lögreglulaga nr. 90/1996 að frátöldum c lið (heilbrigðiskröfur og læknisskoðun) og 2. mgr. 6. gr. reglugerðar nr. 221/2017 eru boðaðir síðari hluta inntökuferilsins.

Læknisskoðun trúnaðarlæknis Mennta- og starfsþróunarseturs lögreglu fer fram í lok ferilsins. Þeir sem fá boð í læknisskoðun eru þeir sem koma til greina í námið.

Ákvörðun um hvaða umsækjendum er boðin innganga í námið byggist á heildarmati, sem eru m.a. niðurstaða þrekprófs og sálfræðimats, mati læknis, framkomu, hæfni í mannlegum samskiptum, sakavottorði og sakaferli að öðru leyti, auk frammistöðu í viðtali og öðrum verkefnum.

Bakgrunnsskoðun


Í bakgrunnsskoðun fellst að skoðuð eru afskipti og samskipti lögreglu við umsækjenda sem eru skráð í málaskrá lögreglu. Frekari upplýsingar um bakgrunnskoðun er að hægt að finna með því að smella á kynningarmyndskeið hér að neðan:

Heilbrigðiskröfur


Umsækjandi skal vera andlega og líkamlega heilbrigður og standast læknisskoðun í samræmi við viðmið Mennta- og starfsþróunarseturs lögreglu til að geta talist að fullu fær til að gegna starfi lögreglumanns. Umsækjandi sem kemur til greina í starfsnám MSL þarf að undirgangast læknisskoðun. Umsækjandi ber sjálfur kostnað af læknisskoðuninni.

Umsækjandi verður að kynna sér vel þær kröfur sem gerðar eru til heilbrigðis áður en sótt er um nám í lögreglufræði. Umsækjandi sem kemur til greina að hefja nám þarf að undirgangast læknisskoðun og mögulega ítarlegra mat í samræmi við viðmið um heilbrigði sem gefin eru út af Mennta- og starfsþróunarsetri lögreglu í samræmi við lögreglulög nr. 90/1996 og reglugerð nr. 221/2017. Standast þarf kröfurnar til að hljóta sæti í náminu. Umsækjendur gangast undir sálfræðimat þar sem lagt er mat á persónuleika, minni, sálrænt ástand og samskipti. Athuganir þessar hafa verið notaðar víðs vegar um heim í inntökuferli á lögreglunemum. Prófin eru talin bæði áreiðanleg og réttmæt í þeim tilgangi.

Viðmið um heilbrigði eru sambærilegar við kröfur sem gerðar eru á hinum Norðurlöndunum og er að finna hér fyrir neðan:

Inntökuferill


Umsækjandi sem stenst skilyrði a og d-liðar 1. mgr. 38. gr. lögreglulaga, fær boð um þátttöku í fyrri hluta inntökuferils sem haldin verða í lok apríl og byrjun maí, og tekur einn dag. Prófað er í þreki en einnig er lagt fyrir umsækjendur skriflegt frásagnarverkefni og sálfræðimat.

Líkamlegt atgervi umsækjenda er kannað með því að láta þá þreyta þrekpróf þar sem reynir á snerpu, styrk, þol og sundkunnáttu. Það er gert með heimild í 28. gr. lögreglulaga nr. 90/1996 og 6. gr. reglugerðar nr. 221/2017. Þrekprófið skiptist í þrjá þætti, hlaup, stöðvaæfingar og sund. Umsækjandi verður að ljúka hverjum þætti þrekprófsins með fullnægjandi árangri. Gerð er krafa um að æfingarnar séu framkvæmdar samkvæmt fyrirmælum prófdómara.

Ljúki umsækjandi ekki einhverjum þætti þrekprófsins með fullnægjandi árangri er þátttöku hans í inntökuferlinu lokið og kemur þ.a.l. ekki greina í námið að sinni.

Hér er að finna kynningarmyndskeið um þrekprófið. Nánari leiðbeiningar er hægt að finna á pdf skjali fyrir neðan myndskeiðið.

Skriflegt frásagnarverkefni


Umsækjandi þarf að mæta með fartölvu í þennan þátt inntökuferilsins. Verkefnið fer þannig fram að umsækjendur horfa saman á myndskeið sem þeir síðan rita 200-300 orða atvikalýsingu um. Við mat á frammistöðu er horft til málfars, stafsetningar og hvernig umsækjanda tekst til með að koma frá sér rituðum texta. Hér er að finna kynningarmyndskeið um verkefnið:

Síðari hluti inntökuferils


Þeir umsækjendur sem standast fyrri hluta inntökuferils og bakgrunnsskoðun eru boðaðir í síðari hluta inntökuferils. Sá hluti ferilsins byggist á viðtali og tekur um 45 mínútur.

Viðtalið er tekið af lögreglumönnum og sérfræðingum innan lögreglunnar sem hafa fengið þjálfun og fylgja hálfstöðluðu viðtalsformi. Svör umsækjenda verða skráð á meðan viðtali stendur.

Um persónuvernd


Persónuvernd

Umsækjendur eru hvattir til þess að kynna sér vel meðferð persónuupplýsingar í tengslum við umsóknarferlið.