Starfsnám í lögreglufræðum er mikilvægur þáttur í lögreglufræðanáminu en til að öðlast starfsréttindi sem lögreglumaður verða lögreglufræðinemar að ljúka starfsnámi hjá lögreglu.

Mennta- og starfsþróunarsetur lögreglunnar (MSL) annast og skipuleggur starfsnámið í samstarfi við Háskólann á Akureyri (HA).

Starfsnámið sjálft hefst ekki fyrr en á vormisseri 1. árs, þ.e. öðru misseri námsins. MSL velur nema í starfsnámið, í samstarfi við HA. Valið fer fram haustmisseri 1. árs en þrátt fyrir að nemendur ljúki öllum áföngum á haustmisseri 1. árs, tryggir það ekki að viðkomandi verði valinn í starfsnámshluta námsins, sjá nánar um val á starfsnámsnemum.

Starfsnámið er byggt upp á lotum sem fram fer að mestu í húsnæði MSL að Krókhálsi 5a, Reykjavík. Náminu verður skipt upp í vinnulotur, starfsnámslotur, þar sem lögð verður áhersla á verklega lögreglutengda þjálfun af ýmsum toga, verklegar æfingar og lausnir raunhæfra verkefna. Á fjórða og síðusta misseri námsins fara nemendur í starfsþjálfun hjá lögregluembætti. Reynt verður að bjóða upp á starfsþjálfun hjá lögregluembætti í heimabyggð nemenda, ekki er þó hægt að tryggja að svo verði.